E para, ndryshe nga sa ti beson, femra nuk është thjesht një objekt martese. Ndoshta eksperienca jote është e tillë që ta shohësh një vajzë thjesht si nuse me të cilën fotot dalin më bukur, marrin më shumë like etj por jo, nuk është ashtu.
E dyta, duke qenë se nuk janë objekte zbukurimi por qënie njerëzore shumë herë më fisnike, të forta, të drejta, të ndershme, të guximshme e të zgjuara se zotrote, ato mund të martohen jo vetëm pa gishta por edhe pa këmbë. Ndoshta ti ke ndonjë pasion të veçantë për gishtat, por na beso nuk është ai sporti më popullor.
E treta, boll abuzuat me Inën se na e shpifët. Ajo pësoi një aksident në punë. Sigurisht që askush nuk ia uron askujt atë ngjarje, por ndodhi. A është e dënueshme? Sa më s'ka.
Ama me sa po duket, më të lumturit që Ina u plagos dukeni ju, takëmet e Edit. I keni marrë gishtat e saj, i keni ngjitur në ballë dhe i shisni si trofe lufte me disa banorë të gjorë që thjesht duan të strehojnë fëmijët.
E teksa Ina është në spital e banorët duke protestuar në shi, zotrote fle te kodra e pasanikëve.
Ndaj boll!
Hesht vetëm një ditë!
Na çliro një ditë të vetme nga neveria!

/marrë nga nisma#thurrje