Asnjë institucion shtetëror nuk duhet të hapë tendera që kanë si objekt prokurimi drekat apo darkat festive. Urdhri vjen nga Agjencia e Prokurimit Publik, në prag të festive të fundvitit, duke u bazuar në praktikat e viteve të kaluar, ku shumë institucione përdornin fondet publike për organizimin e këtyre aktiviteteve.

“Autoritetet kontraktore duhet të mbajnë në konsideratë mirëpërdorimin e fondeve publike si një ndër parimet kryesore të legjislacionit të prokurimit publik me qëllim plotësimin e nevojave konkrete të tyre dhe uljen e shpenzimeve proceduriale”, thuhet ndër të tjera në dokumentin e APP-së që mban datën 4 dhjetor 2018.

Ky është viti i dytë që Agjencia e Prokurimit Publik tërheq vëmendjen e institucioneve për këto lloj tenderësh.

Një praktikë e ngjashme u ndoq edhe vitin e kaluar, ku përveçse u kërkua që të mos hapeshin procedura të tilla, Ministria e Financave dhe Ekonomisë, në datën 28 dhjetor 2017 njoftoi se Thesari do të bllokonte ekzekutimin e të gjitha pagesave për objekte të tilla prokurimi.

Vjet, vetën në 20 ditët e para të muajit dhjetor u hapën rreth 25 procedura të tilla prokurimi, ndërkohë që sivjet tenderët e shpallur në kuadër të festave të fundvitit lidhen vetëm me dekorimin e qyteteve apo blerjen e fishekzjarrëve.