Raportet e ndryshme nga institucione vendase apo ndërkombëtare flasin për nivel të lartë korrupsioni dhe inefiçencë të institucioneve në luftën ndaj tij.

Shkak për të cilin Kontrolli i Lartë i Shtetit ka propozuar krijimin e një Agjencie kombëtare Antikorrupsion. Nisma është bërë publike nga Drejtoresha e Përgjithshme e KLSH, Lindita Milo Lati, gjatë një takimi ku morën pjesë përfaqësues nga institucione të ndryshme në vend, nga Bashkimi Evropian e nga Transparency International.

Mario Mariani, Shef i Bashkëpunimit në Delegacionin e Bashkimit Evropian theksoi se perceptimi i publikut ashtu si dhe sondazhet flasin për nivele të larta korrupsioni. Ai përmendi disa prej sektorëve që kanë shënuar përmirësim në këtë drejtim, ashtu si dhe ata që mbeten problematikë, ndërkohë që përshëndeti krijimin e KLGJ dhe KLP.

IDM, një prej bashkë organizuese të takimit solli në vëmendje disa sondazhe që sjellin një perceptim shumë të lartë të publikut për nivelet e korrupsionit, duke nënvizuar se mekanizmat aktualë janë tërësisht nën kontrollin e Qeverisë.