Nëse do të shikosh në njoftimet e Bashkisë së Tiranës do të duket se gjithçka shkëlqen. Por kjo është një pamje që ofrohet për qendrën. Jo larg sheshit "Skënderbej", në zonën e fushës së aviacionit në unazë e në shumë të tjera, natën nuk ka as ndriçim. Për të mos folur për rrugët që janë në një situatë të rëndë.

Situata është krijuar në kohën kur kryeqyteti ka marrë buxhetin më të madh në vite. Prej zgjedhjes si kryetar bashkie Erjon Veliaj ka përfituar fonde dhe për shkak të ndarjes së re territoriale, duke administruar dhe ish komunat. Vetëm në vitin 2019 buxheti shkon në rreth 144 milionë dollarë, shumë që shënon një nivel historik.

Por jo gjithmonë ka qënë kështu. Paraardhësit e Erion Veliajt nuk kanë pasur të tillë fat. Buxheti më i lartë kur Lulzim Basha drejtonte Bashkinë e Tiranës ka qënë afro 70 milionë dollarë. Ndërsa Edi Rama që njihet për transformimin që i solli kryeqytetit ka pasur në dispozicion në vitin më të mirë afro 45 milionë dollarë. Nga këto të dhëna rezulton se Erion Veliaj është kryetari me buxhetin me të majmë afro 3 fish më të lartë se kryebashkiaket e tjerë, kjo edhe për faktin se aderon në të njëjtën parti që drejton pushtetin. Pyetja është si administrohen fondet kur me këtë shumë do të duhet të kishim ndryshim rrënjësor të Tiranës, dhe jo ripërsëritje të të njëjtëve probleme.

Në fakt të ardhurat në buxhet janë shtuar si prej ish komunave por dhe për shkak të taksave. Prej tyre ajo e ndikimit në infrastrukturë në ndërtimet e reja u rrit nga 4% e kostos në 8% të çmimit të apartamentit. Taksa e dytë nga e cila Bashkia do të arkëtoje 510 milionë lekë është ajo e ndërtesës.

Po ashtu tarifa që rëndon më tepër xhepin e familjeve është edhe ajo e pastrimit. Nga kjo tarifë pritet të mblidhen rreth 2.1 miliardë lekë dhe rezulton se në raport me 2018-n, bizneset dhe familjarët do të paguajnë 7% më shumë. Mesatarisht rezulton se një familje i paguan Bashkisë së Tiranës tarifa dhe taksa afro 7 mijë e 500 lekë.

Edhe bizneset do të nxjerrin më shumë të ardhura nga buxheti i tyre për t`ja dhënë Bashkisë pasi nga taksa e tabelës synohen të arkëtohen 400 milionë lekë në 2019-n, me rritje 15% me bazë vjetor ndërsa për zënien e hapësirave publike, ato do të paguajnë 420 milionë lekë, 19% më shumë se viti 2018.

Por buxheti i lartë dhe investimet duket se nuk kanë shkuar në të njejtën linjë. Nga një vëzhgim në Tiranë rezulton se ndërhyrjet janë përqëndruar vetëm në qendër ndërsa vetëm pak metra larg Sheshit Skënderbej shkelqimi i qendrës nis e zbehet.