Banorët e “Astirit” vijojnë protestën e tyre të pa ndërprerë as edhe natën e ndërrimit të viteve, ndërsa sot kanë prekur ditën e 61-të të saj.

Banorët që tashmë nuk kërkojnë vetëm dëmshpërblim në vlerë 100% të banesës apo biznesit të prekur nga projekti i Unazës së Madhe, por anulimin e plotë të këtij projekti, pasi sipas tyre është i korruptuar, kanë bllokuar sërish qarkullimin e automjeteve.

Në përkrahje të banorëve kanë shkuar sërish deputetë të opozitë, ku deputeti demokrat Klevis Balliu, u shpreh se protestuesit kanë mbështetjen e opozitës së bashkuar dhe kanë për të fituar.

Nga ana e tij, Dorian Protoduari, ka paralajmëruar kryeministrin Edi Rama, se nuk do të mund t’i shkulë nga shtëpitë e tyre pa i vrarë më parë.

Ai u shpreh se janë të gjithë të bashkuar për një qëllim, ndërsa juristi Artan Manushaqe, i bëri thirrje prokurorisë të nisë hetim mbi të gjitha koncesionet.