Kryebashkiakja e Romës dhe kisha katolike ndodhen në konflikt mbi përdorimin e 1.5 milionë euro në monedha që hidhen çdo vit nga turistët në shatërvanin e famshëm “Fontana di Trevi”.

Që pre vitit 2001, paraja i është dhënë organizatës katolike të bamirësisë Caritas, për të financuar projekte që ndihmojnë të varfrit e Romës.

Megjithatë, kryebashkiakja populiste, Virginia Raggi, po kërkon që ta përdorë paranë në projekte të rinkonstruktimit për infrastrukturën e kryeqytetit italian.

Duke u quajtur “beteja e monedhave” në mediat italiane, Caritas ka luftuar ndaj rregullores së re nga Qeveria e Romës që synon t’i kanalizojë paratë ndaj një pale të tretë, që do t’i shpërndajë në fonde, si mirëmbajtja e monumenteve të shumta të qytetit.

“Paraja po merret nga më të varfërit”, shkruante Avvenire, e përditshmja italiane që lidhet me kishën katolike. Virginia Raggi ka thënë se është e irrituar nga toni i debatit, sipas Corriere della Sera.

Ajo ka thënë se një pjesë e parasë do të shkojë te organizata bamirëse, por jo e gjitha. Një anëtare e lëvizjes populiste 5 Yjet, Raggi është vënë nën presion për të trajtuar çështjet e mëdha të infrastrukturës në Romë.

Pavarësisht kësaj, shumë banorë janë të shqetësuar me vendimin për të marrë paranë që i është dhënë prej kohësh të varfërve.