Në Prokurorinë e Krimeve të Rënda kallëzohet një skemë mashtrimit. Shtetasi Arben Myzeqari ka drejtuar gishtin te zyrtarët: Ardit Bido-drejtori i Drejtorisë së Përgjithshme të Arkivave, Kosta Bajraba-kryetar i komisionit të përhershëm ekspertëve në DPA, Xhevahir Çeloaliaj-drejtori i Institutit të Policisë Shkencore në Drejtorinë e Përgjithshme të Arkivave dhe ekspertët Durim Çako e Vladimir Ikonomi. Po ashtu e kallëzuar është shtetasja Sara Resuli. Cila është skema e mashtrimit? Fillimisht shtetasja Resulli “i ka dhuruar” Drejtorisë së Përgjithshme të Arkivave një vërtetim pronësie të vitit 1921. Komisioni i përhershëm i ekspertëve (KPE), pa këqyrur elementet historike apo vlerën si dokument me vlerë historike, ka vendosur më 21.3.2017 mospranimin pa certifikim. Më pas, del rregullorja e re e DPA-së duke ndryshuar 3 VKM të mëparshme, pra VKM nr.360, datë 24.6.2018. Me vendimin nr.4, datë 6.12.2018 KPE vendos pranimin e dokumenteve sepse ishte “vërtetuar” nga Instituti i Policisë Shkencore. Nuk dihej as origjina e tyre, si dhe ishin lehtësisht të dallueshëm të ndryshëm nga të tjerët. KPE nuk bën asnjë lloj krahasimi me dokumente të ngjashme në AQSH. Dokumentet e "dhuruara" dallohen menjëherë si të falsifikuara, pasi në to gjendet një institucion i paqenë si Prefektura e Fierit, në një kohë që përbën fakt historik se deri në vitin 1944 ka qenë Nënprefektura e Fierit. Ata që kanë gatuar këtë material, nuk e kanë ditur një fakt të tillë. Mbetet të shihet si do veprojnë organet e hetimit, pasi është përfshirë edhe policia në këtë skandal të rëndë. Synimi i "dhurimit" ka qenë që dokumentet të dalin më vonë si dokument shtetëror.