Tre persona janë vënë në prangat e policisë në zonën e Kamzës, të dyshuar për vjedhjen e bagëtive të trasha.

Pas hetimeve të kryera gjatë kësaj të hëne është bërë zbardhja e një sërë vjedhjesh të tjera në fushën e pronës, të kryera po nga të dyshuarit.

Kështu policia vuri në pranga Altin Murati, 25 vjeç, banues në Kamëz; Behar Zefi, 33 vjeç, banues në Velipojë dhe Gëzim Doçi, 27 vjeç, banues në Mamurras.

Gjithashtu u shpall në kërkim R. M., 30 vjeç, banues në Kamëz.

Katër të rinjtë akuzohen se në bashkëpunim me njëri-tjetrin më 13 mars, në Zall-Herr i kanë vjedhur dy bagëti të trasha shtetasit A. N.

Nga veprimet hetimore të kryera rezulton se katër të dyshuarit në harkun kohor janar 2018-mars 2019 kanë kryer një sërë vjedhjesh ku kanë vjedhur 18 bagëti të trasha.

Në momentin e arrestimit policia iu ka gjetur të rinjve dy lopë, të cilat këta i kishin vjedhur. Gjithashtu Policia ka sekuestruar në cilësinë e provës materiale tre automjete.

Aktualisht vijon puna në bashkëpunim me policitë e qarqeve të tjera për zbardhjen e vjedhjeve të tjera të kryera nga këta shtetas.