Rreth 180 nxënës, të shoqëruar nga prindërit e tyre, kanë zhvilluar ditën e dytë të protestës në fshatin Sheze, duke bllokuar edhe qarkullimin e automjeteve, në rrugën Shez – Belesh.

Me pankarta në duar, për gati dy orë, nxënësit e kësaj shkolle nuk kanë pranuar të shkojnë në shkollën e Pekishtit dhe të zhvillojnë mësimin në turnin e dytë, pasi nuk i kanë kushtet.

Shkolla 9-vjeçare në Sheze, pësoi dëmtime pas tërmetit që ra në Qershor të vitit 2014.

Gjatë këtyre 5 viteve shkolla u mbyll.

Zyra vendore e Arsimit në Peqin, disa herë i dërgoi informacion Bashkisë së qytetit por asnjëherë nuk mori përgjigje të saktë.

Nga ana e Ministrisë së Arsimit nuk u lëvrua fondi për rikonstruksionin e shkollës. Edhe sot e kësaj dite shkolla është e amortizuar dhe e mbylluar.

Edhe administratori i njësisë administrative Sheze, Alban Cullhai është solizariduar me protestën e nxënësve e prindërve të tyre, shkruan Faxnews.

Teksa ka ardhur autobuzi me nxënës nga fshatrat Karthnek, Trash dhe Grykesh, policia bashkiake është konfliktuar me prindërit e nxënësve pasi nuk lejonin nxënësit të zbriste nga autobuzi.