Një ditë pasi në media u diskutua gjerësisht nëse ka një plan B ndaj integrimit të plotë në Bashkimin Europian, reagoi edhe ambasadorja franceze në Tiranë. Christina Vasak ka folur nga Elbasani në lidhje me qëndrimin e Francës sa i përket zgjerimit të BE.

Vasak deklaroi se është momenti që gjërat të fillojnë të merren nga baza. Ambasadorja tha se vendimi i Këshillit Europian nuk i mbyll dyert Shqipërisë. Gjithashtu ajo vuri theksin edhe tek Samiti i Zagrebit, duke u shprehur se mund të ketë dritë jeshile për Shqipërinë.

Vasak tha se ta keni të qartë se presidenti francez është shprehur qartë mbi mbështetjen që do t’i japi Shqipërisë dhe vendeve të tjera që aspirojnë të jenë pjesë e BE-së.

“Është momenti që gjërat të fillojnë të merren nga baza. Vendimi i Këshillit Europian nuk i mbyll dyert Shqipërisë. Presidenti francez është shprehur qartë mbi mbështetjen që do t’i japë Shqipërisë dhe vendeve të tjera që aspirojnë të jenë pjesë e BE-së”.

“Samiti i Zagrebit në maj të 2020-ës është shumë i rëndësishëm. Mund të ketë dritë jeshile për Shqipërinë. Vendimi i KE-së në tetor nuk i mbylli dyert vendit tuaj. Franca dhe presidenti i saj Macron mbështetin çeljen e negociatave”, nënvizon ambasadorja e Francës në Shqipëri.

Sipas disa mediave të huaja, vendet e Ballkanit Perëndimor mund të bëhen pjesë e tregjeve të BE-së, siç është rasti i Norvegjisë, por nuk do jenë anëtarë me të drejta të plota në BE.

Ky mendohet se do jetë propozimi i Francës pranverën që vjen.