Rritet sërish numri i viktimave nga tërmeti shkatërrues 6.4 i shkallës Rihter që goditi rreth orës 4 të mëngjesit të martës. Burime nga spitali i Traumës në kryeqytet bëjnë me dije se ka humbur jetën Xhesika Biquku, rreth të 20-tave, e cila ishte dërguar në spital, pas dëmtimeve të shumta si pasojë e shembjes së godinës ku ndodhej nga tërmeti. E reja e cila nodhej në koma nuk mundi të mbijetonte, konfirmuan burime zyrtare nga Ministria e Shëndetësisë.

Më herët, 47 persona të pajetë janë nxjerrë nga rrënojat në Durrës dhe Thumanë, 1 person humbi jetën si pasojë e aksidentit pas dëmtimit nga tërmeti në afërsi të Lezhës, 1 u hodh nga lartësia për shkak paniku në Kurbin, ndërsa një tjetër person pësoi infarkt pas goditjeve.

Nga Ministria e Shëndetësisë u njoftua se mbi 900 persona të lënduar nga tërmetet. Tre prej tyre janë transferuar në Itali për një trajtim më të specializuar.

Ministria e Mbrojtjes njoftoi se operacionet e kërkim-shpëtimin nën rrënoja janë ndërprerë, ndërsa ka nisur puna nga ekspertet vendas dhe ata të huaj për evidentimin e dëmeve materiale.