Presidenti Meta: Jemi para testit sa besojmë në vlerat euro-atlantike

Saturday, 21 December 2019 15:08

Presidenti Ilir Meta, në një intervistë  për televizionin boshnjak “O Kanal” ka folur për procesin e integrimit të Shqipërisë dhe rajonit në Bashkimin Europian. Kreu i shtetit deklaroi se pas refuzimit të BE për negociatat, “nuk është koha për të nxjerrë në ankand të ardhmen tonë. Jemi para testit sa besojmë në vlerat euro-atlantike”.

Gazetari: Bashkimi Evropian i tha “jo” Shqipërisë dhe Maqedonisë së Veriut për hapjen e negociatave të anëtarësimit, duke e shtyrë sërish për në pranverë mundësinë e çeljes së negociatave. Mendimi juaj mbi këtë proces? 

 

Presidenti Meta: Tani është koha që ne të shumëfishojmë përpjekjet tona dhe të konsiderojmë këtë hezitim, mungesën e një vendimi pozitiv, që vjen gjithashtu edhe për shkak të debateve të brendshme dhe reformave brenda Bashkimit Europian, si një test për vendet tona.

Të tregojmë që angazhimi ynë për të zhvilluar vendet tona dhe rajonin bazuar në vlerat europiane është serioz.

Ky është një test që duhet ta kalojmë me sukses dhe duhet gjithashtu të bindim vendet skeptike, që ne jemi vende serioze, ne jemi plotësisht të motivuar dhe mbetemi të angazhuar për të ndërtuar të ardhmen europiane për vendet tona dhe shoqëritë tona dhe që ne meritojmë mbështetje më të madhe në të ardhmen.

Nuk është momenti dhe koha për të treguar se ne nuk jemi seriozë apo që po kërkojmë opsione të tjera, sepse duke bërë kështu ne do t’u shtojmë dyshimet njerëzve brenda BE-së, të cilët janë skeptikë për zgjerimin e Europës në të ardhmen. Gjithashtu, do të dobësonim të gjithë mbështetësit tanë, që kemi brenda BE-së dhe shumica e vendeve dhe forcave brenda BE-së janë pro zgjerimit të unionit dhe përfshirjes së gjithë vendeve të Ballkanin Perëndimor, jo vetëm për Shqipërinë dhe Maqedoninë e Veriut.

Pra, duhet të vazhdojmë me reformat dhe të tregojmë që ne po i bëjmë këto reforma në radhë të parë për qytetarët tanë dhe që nuk mund ta braktisim projektin e BE-së, sepse për ne, vendet në këtë rajon, ky është gjithashtu një projekt thelbësor për të garantuar në terma afatgjatë paqe, stabilitet, bashkëjetesë, respekt për të gjitha minoritetet në këtë rajon, në mënyrë që mos të rikthehemi në periudhën e errët të konflikteve, që kanë shkatërruar njerëzit tanë dhe vendet tona në të kaluarën.

Gazetari: Zoti President, ka tashmë më shumë se 20 vjet që Shqipëria pret për çeljen e negociatave të anëtarësimit në Bashkimi Europian. Sa mendoni që do ju duhet të prisni akoma?

Presidenti Meta: Ne prisnim që kjo të ndodhte që dje, por gjithsesi ne duhet të vazhdojmë me këto reforma, ne duhet të punojmë të gjithë bashkë, jo vetëm me Maqedoninë e Veriut, por dhe me vendet e tjera të Ballkanit Perëndimor, të gjithë partnerët tanë për të përmirësuar ekonominë e tyre, për të përmirësuar sundimin e ligjit, për të pasur një klimë më të mirë biznesi për investitorët e huaj, të luftojmë krimin e organizuar, që është një dhimbje koke për shumë vende në BE, për të dekurajuar kërkesat e azilkërkuesve nga Shqipëria në BE, që është gjithashtu një tjetër dhimbje koke për disa vende, që janë skeptike për zgjerimin e BE-së në rajonin tonë.

Dhe nëse i bëjmë këto jam i sigurt që përpjekjet tona do të jenë të suksesshme, le ta konsiderojmë këtë si një test, për të treguar se sa serioz dhe sa të angazhuar jemi, nëse jemi europianë të vërtetë apo jemi shumë pragmatistë dhe hapim kështu një ankand për të parë se kush do të ofrojë më shumë dhe sa më shpejt të jetë e mundur pa marrë në konsideratë faktin se e ardhmja jonë ka nevojë për themele solide dhe vetëm vlerat europiane janë themelet e duhura në terma afatgjatë e me prosperitet për vendin tonë.

Modifikuar më Saturday, 21 December 2019 15:51
Login to post comments

Lajmet e fundit

Paditet kryebashkiaku i Nju Jorkut/ Hetimi federal dhe dyshimet për financimin e fushatës

Globi

Paditet kryebashkiaku i Nju Jorkut/ Hetimi federal dhe dyshimet për financimin e fushatës

    Kryebashkiaku i Nju Jorkut, Eric Adams është paditur për të paktën një akuzë penale dhe është vënë nën hetim federal. Adams do t'i dorëzohet autoriteteve në fillim të javës së ardhshme...

Kraja: Degradim i shtetit ligjor! Korrupsioni i Ramës dihet nga ndërkombëtarët, por ata shpeshherë e mbyllin një sy

Politikë

Kraja: Degradim i shtetit ligjor! Korrupsioni i Ramës dihet nga ndërkombëtarët, por ata shpeshherë e mbyllin një sy

    I ftuar në edicionin e pasdites në SYRI TV me moderatorin Edvin Parruca për të folur për shpërqëndrimin që po i bën Rama shqiptarëve me 'Shtetin Bektashi', mes skandaleve që...

Xhuljan Guçe: Qytetarët e Korçës nuk pranojnë më premtime “pe leshi”

Politikë

Xhuljan Guçe: Qytetarët e Korçës nuk pranojnë më premtime “pe leshi”

Nga Xhuljan Guçe: Në një deklaratë të fundit, drejtuesi i Partisë Socialiste në Korçë, z. Niko Peleshi, njoftoi se partia e tij synon të sigurojë 6 mandate në këtë qark, duke...