Gjykata e Korçës la në arrest me burg 18-vjeçarin Devis Hoti, i dyshuar për vrasjen e Flamur Ducit në fshatin Mborje.
I riu me precedent penal deklaroi se është i pafajshëm përpara gjykatës, kurse avokati mbrojtës kërkoi një masë më të lehtë për adoleshentin. Adoleshenti u shfaq i qetë përpara gjykatës.
Por gjykata besoi se provat e prokurorisë janë të forta.
E para, prokuroria thotë se ka siguruar një fije floku të gjetur në dorën e viktimës dhe njollat e gjakut në veshjen e autorit të dyshuar, që përputhen me ADN-në. Nga këqyrja e marketit në pronësi të Ducit është vërejtur mungesa e thikës që shërbente për prerjen e bulmetit. Përveç kësaj, në pllaka janë vënë re pika gjaku, që janë marrë në cilësinë e provës.
Mësohet se Duci është qëlluar tetë herë me thikë, në fytyrë dhe zemër.
Së dyti, prokuroria thotë se ka siguruar dëshmi kontradiktore të prindërve të 18-vjeçarit. Përveç kësaj, në një bisedë ambientale, i riu dëgjohet duke i diktuar xhaxhait të tij se çfarë duhet të thotë për grupin e hetimit.
Deri më tani mungon një motiv për arsyen që e ka shtyrë të riun drejt këtij krimi të rëndë.
Mediat kanë spekuluar se bëhet fjalë për një sherr banal. Ka pasur edhe raportime se arsyeja e sherrit ka qenë një femër.