Ish-deputetja e PD, Jorida Tabaku së bashku me përfaqësues të PD-së, kanë vizituar këtë të martë bizneset e prekura nga tërmeti në njësinë nr 4 në kryeqytet. Përmes një reagimi në FB, ish-deputetja thotë se klima që përfaqëson sot sektorin e biznesit është totalisht e pa shpresë.

“Ajo që dëgjoje nga goja e tyre nuk ngjasonte aspak me çfarë dëgjon nga goja e propagandës së ministrisë së financave dhe ekonomisë. Një skamje e madhe, mungesë konsumi dhe mosbesim në këtë qeveri. Aq i madh ishte mosbesimi saqë edhe socialistë që kishin votuar këtë qeveri nuk gjejnë më kurajën të justifikojnë këtë sjellje arrogante”, shprehet ish-deputetja.

Sipas Tabakut, shqiptarët kanë tkurrur konsumin e tyre familjar pasi kanë frikë dhe mosbesim tek qeveria Rama, ndërsa shton se situata paraqitet e rëndë saqë shumë biznese “janë tanimë të gatshëm të mbyllin qepenat, askush në qeveri nuk iu përgjigjet shqetësimeve të tyre.”
“Sipërmarrësit e vegjël e dinë më mirë se kushdo situatën ekonomike në vend, ata sa herë u tregon justifikimet e qeverisë të përgjigjen me fletoret e borxheve apo biznese që nuk shesin prej fillimit të muajit. Të tjerë tregojnë taksat e larta, ankohen për 1200 euro në vit taksë shtesë që do rrisë çmimet”, shkruan ajo.

Ish-deputetja shton se biznesi ka nevojë për frymëmarrje, jo vetëm ai i prekur nga tërmeti i kobshëm i fund nëntorit. “Çdo biznes ka nevojë të shpëtojë nga tërmeti 7 vjeçar me emrin rilindje socialiste. Qeveria gabon kur mendon se mund të gënjejë bizneset me gjoja “vëzhgime pas tërmeti”, thekson ish deputetja, duke shtuar se e vetmja shkaktare e “tërmetit ekonomik” është qeveria.