Si çdo vit, edhe sot të dyja brigjet e lumit Osum u mbushën mëngjesin e sotëm me besimtarë ortodoksë, emigrantë dhe qytetarë, në pritje të hedhjes së kryqit.

Me gjithë temperaturat e ulëta, kjo festë e përvitshme ka bërë bashkë në qytetin e Beratit qindra qytetarë beratas, mes tyre edhe besimtarë myslimanë që çdo vit bëhen pjesë e kësaj feste të shenjtë, ujit të bekuar.

At Petraqi, i shoqëruar nga përfaqësues të Kishës Ortodokse dhe pushtetarë vendorë, janë nisur nga Katedralja e Shën Dhimitrit në qendër të qytetit dhe pasi kanë përshkruar në këmbë pedonalen, kanë mbërritur në Urën e Goricës. Për të pritur kryqin, në ujërat e ftohta të lumit Osum janë hedhur 8 të rinj beratas.
Kryqi u hodh nga At Petraqi dhe pasi përfundoi në ujërat e Osumit u kap për të dytin vit radhazi nga 42-vjeçari Alfred Xhimitiku, banues në lagjen Goricë.

Pas kapjes së kryqit, Xhimitiku ka uruar të gjithë besimtarët ortodoksë dhe jo vetëm për një vit sa më të mbarë. Si traditë, pas kapjes së kryqit, Xhimitiku shkon derë më derë me kryqin në dorë, në çdo familje beratase, ku merr bekimin nga familjarët.
***
Besimtarët ortodoksë në qytetin e Fierit kanë festuar këtë 6 janar ditën e Ujit të Bekuar. Kisha e Shën Gjergjit ka organizuar hedhjen e kryqit në ujë. Procesioni nisi me meshën në kishë dhe më pas vargu i gjatë i besimtareve iu drejtua shatërvanit në sheshin “Europa”, ku çdo vit bëhet hedhja e kryqit në ujë.

Tre të rinj u hodhën sipas zakonit në ujë për të marrë kryqin, edhe pse temperaturat këtë të hënë ishin tepër të ulëta.

Ishte 16-vjeçari, Athanas Davidhi, ai që nxori kryqin nga uji, për të gjashtin vit radhazi. I riu ia ka dorëzuar kryqin metropolitit të Apolonisë dhe Fieirt, At Nikolla, duke marrë bekimin e tij.

Ceremonia e hedhjes së kryqit në ujë i parapriu mesha në kishën e Shën Gjergjit, aty ku qindra besimtarë morën në shtëpi edhe ujin e bekuar.