Duket se pamundësia për të zbardhur ngjarjet e rënda dhe autorët e tyre, ka detyruar kupolën e policisë së shtetit që të kthejë gishtin nga vetja duke kërkuar spiunë brenda radhëve të veta.

Kështu mësohet se drejtori i Përgjithshëm i Policisë së Shtetit, Ardi Veliu, gjatë takimit të mbyllur që zhvilloi ditën e hënë në drejtorinë e Tiranës me drejtuesin, shefat e krimeve, rendit dhe sektorësh të ndryshme mbi ngjarjet e fundit kriminale, u ka komunikuar dy urdhëra të prerë.

Sipas gazetares se `Report Tv`, Xhensila Kodra, urdhëra i parë i Veliut lidhet me heqjen e telefonave nga efektivët e policisë gjatë shërbimit, për të shmangur rrjedhjen e informacionit apo dekonspirimet.

Mësohet se që tani e tutje disa kategori të strukturave të policisë, përfshirë ata që veprojnë në terren nuk duhet të mbajnë telefonat me vete, por ti dorëzojnë përpara se të nisin shërbimin. Komunikimi do të bëhet, vetëm me radion e policisë.

Urdhri i dytë lidhet me agjentët e policisë, për të cilët Veliu ka kërkuar që në fund të ditës të përpilojnë një procesverbal mbi rutinën, çfarë kanë hetuar, kontrolluar apo takuar gjatë ditës. Këto masa ekstreme Brenda radhëve të policisë vijnë menjëherë pas deklaratave të ministrit të Brendshëm, Sandër Lleshajt, i cili pak ditë më parë në Lezhë,  në një takim pas ekzekutimit mafioz me snajper në mes të qytetit të Rëshenit, u kërkoi drejtuesve të policisë që të ruajnë sekretin hetimor, pasi ka pasur rrjedhje të informacioneve.