Leonidha Musaj

Dita e dytë e shtetrrethimit e gjeti Durrësit më të ngrysur se kurrë. Të gjitha rrugët dhe sheshet e qytetit bregdetar shfaqen të boshatisura si asnjë herë më parë.

Qytetarët i janë përgjigjur thirrjes për të mos dalë nga shtëpia nëse nuk kanë një arsye serioze, ndërsa të vetmet automjete që lëvizin janë ato me autorizim nga Policia e Shtetit.

Durrsakët janë mbërthyer nga paniku dhe refuzojnë të dalin në ambiente të hapura, veç atyre që dalin për pak çaste për të shkuar në dyqane apo furrë buke. Të vetmit që shfaqen rrugëve të qytetit janë efektivë policia apo personat që merren me disinfektimin e rrugëve apo institucioneve shtetërore.

Këtë të shtunë, Poliklinika e Specialiteteve ishte e mbyllur, ndërsa mësohet se gjatë këtyre ditëve shërbimet janë dhënë online, me qëllim të mos kishte grumbullime njerëzish. Edhe Spitali Rajonal i Durrësit ka pasur një numër shumë, shumë të ulët të rasteve urgjente.

Qytetarët shmangin sa më shumë ambientet spitalore apo klinikat në lagjet e tyre, pasi kanë frikë mos infektohen me Covid-19. Në Durrës ka mbërritur në pesë numri i të prekurve, madje në qytetin bregdetar është shënuar edhe viktima e parë e koronavirusit në Shqipëri. Mes të prekurve rezulton edhe mjeku që i shërbeu 73-vjecares, e cila ishte infektuar me COVID-19 në Itali ku ndodhej disa ditë më parë për të kryer disa vizita shëndetësore.

Ai, sikurse tre të prekurit e tjerë dhe familjarët e tyre janë vetëkarantinuar për të paktën 14 ditë. Ndërsa dita-ditës numri i të prekurve me kotonavirus shtohet, autoritetet kanë përgatitur konvaleshencën e Ministrisë së Mbrojtjes, të cilën e kanë përshtatur si karantinë. Por deri me tani nuk ka qenë e domosdoshme të vihet në përdorim, pasi të prekurit me COVID-19 po mbahen në repartet infektive. Të katër personat e infektuar në Durrës janë në gjendje të mirë shëndetësore momentalisht.