Ministria greke e Emigracionit dhe Azilit zgjati me 4 muaj vlefshmërinë e lejeve të qëndrimit dhe kartat e aplikantëve për mbrojtje ndërkombëtare.

Vendimi u vjen në ndihmë disa mijëra qyetarëve shqiptarë që kanë marrë apo aplikuar për azil në Greqi dhe dokumentet e tyre kishin skaduar apo skadojnë gjatë kësaj periudhe.

Ministria greke e Emigracionit njoftoi gjithashtu se afatet e tjera që lidhen me procedurën administrative për regjistrimin dhe shqyrtimine kërkesave, dhënies apo revokimit të regjimit të mbrojtjes ndërkombëtare të shkallës së parë dhe të dytë janë pezulluar. Nga vendimi më i fundit i njoftuar në Gazetën Zyrtare përfitojnë shtetasit shqiptarë që kanë kërkuar azil në Greqi, por nuk përfitojnë shtetasit shqiptarë që kanë qenë në Greqi me pasaportë shqiptare për një periudhë 90 ditore. Këta shtetas duhet të respektojnë rregullat e Shengenit.

Greqia nuk e ka shtyrë afatin 90 ditor të qëndrimit të të huajve megjithë situatën e pandemisë se Koronavirusit. Nga vetë qytetarët shqiptarë janë raportuar raste ku ata janëpenalizuar me gjoba nga policia greke pasikishin shkelur afatin prej 90 ditësh qëndrimi në Greqi. Ndërkohë pak kohë më parë Qeveria greke vendosi të shtyjë me 5 muaj lejet e qëndrimit dhe vërtetimet e dorëzimit të kërkesës për ripërtëritjen tyre për të gjithë emigrantët e huaj, pjesa dërrmuese e të cilëve janë nga Shqipëria.

Sipas vendimit të publikuar në Fletoren Zyrtare lejet e qëndrimit që skaduan nga 11 shkurti deri në 11 mars dhe ato që skadojnë nga 12 Marsi deri më 12 Maj ripërtërihen automatikisht deri më 12 tetor. Po kështu deri më 12 tetor ripërtërihen automatikisht vërtetimet për aplikimin për karta të reja që skadonin nga shkurti deri në maj.