Me kalimin e ditëve duket se askush nuk po pyet më për koronavirusin, dhe të gjithë po dalin në rrugë për pagën e luftës, dhe për bukën e familjeve të tyre.

Punonjësit e fasonerisë nga qyteti i Kuçovës janë mbledhur sot të gjithë bashkë dhe janë nisur që herët në mëngjes nga qyteti i Kuçovës për të protestuar për të dytën ditë radhazi përpara Drejtorisë së Tatim-Taksave Berat. Për shkak të mungesës së mjeteve urbane dhe autobuzave, ata e kanë përshkruar qytetin e Beratit në këmbë por janë ndaluar nga policia në afërsi të Urës së Varur.
Pas shumë debateve me forcat e policisë, që shoqëruan në polici disa prej protestuesve, të tjerët mundën të shkojnë ti bashkohen protetsës. Një përfaqësi e punonjësve të këtij biznesi që prodhon çanta në qytetin e Kuçovës kanë protestuar edhe dje përpara Drejtorisë së Tatimeve. Shkak për këtë protestë është bërë mos-pagimi i “pagave të luftës” për 159 punonjësit e kësaj ndërmarrjeje që me vendim të qeverisë është mbyllur në datën 9 Prill. Protestuesit shprehen se,fasoneria ku ata punojnë ka 159 punëtorë dhe të gjithë janë të siguruar por askush nuk ka marrë “pagën e luftës”.

Protestuesit kërkojnë tu kalohet menjëherë kjo pagë që u është premtuar nga kryeministri dhe të mos tallen me djersën e tyre. Punonjësit kanë deklaruar se,nqs nuk u kalon “paga e luftës” siç u është premtuar ata do të përshkallëzojnë protestat e tyre,deri në grevë urie.

Ndërmarrja fasone e prodhimit të çantave në qytetin e Kuçovës ka 159 punëtorë dhe për shkak të situatës së rënduar nga pandemia e virusit Covid-19, ky biznes është mbyllur në 9 Prill.