Kompanitë e inceneratorëve, të cilët marrin qindra miliona euro nga buxheti i shtetit, nuk paguajnë këstet e kredisë. Një bankë e nivelit të dytë ka bllokuar llogaritë e kompanive koncensionare të djegësve të Fierit dhe Elbasanit, për shkak se nuk kanë qenë korrekte me pagesat. Kjo forcon dyshimet për skemën e zhvatjes masive me paratë publike

Një bankë e nivelit të dytë në Shqipëri ka bllokuar llogaritë e kompanive koncesionare të landfillit të Elbasanit dhe Fierit, duke dhënë një dëshmi të radhës se afera e inceneratorëve ishte një skemë zhvatjeje masive të parave publike.

Në media është raportua se banka ka bllokuar llogaritë e ‘Albtek Energy’ dhe ‘Integrated Technology Waste Treatment Fier’, për shkak se nuk kanë paguar këstet e kredive. Kontratat koncesionare të nënshkruara mes qeverisë së Edi Ramës dhe kompanive të Klodian Zotos e Stela Gugalljas, parashikonin që inceneratori i Elbasanit dhe i Fierit do të ndërtoheshin me fondet e shoqërive private dhe shteti do të kryente pagesat me këste për disa vite.

Por, siç ka raportuar më herët ‘Syri Televizion’, dy kompanitë private nuk kanë pasur burime financiare. Të dyja këto kompani kanë marrë kredi bankare për realizimin e veprave publike, duke vënë si barrë hipotekore pikërisht kontrata koncesionare me Shtetin.

Shoqëria ‘Albtek Energy’, në pronësi formale të Stela Gugallja, ka marrë kredi bankare në Qershor 2015, duke vendosur kolateral kontratën koncesionale për inceneratorin e Elbasanit. Në muajin Nëntor të vitit 2016, edhe kompania ‘Integrated Technology Waste Treatment Fier’, në pronësi të Klodian Zotos, vendos kolateral kontratën koncesionare për inceneratorin e Fierit, me qëllim marrjen e kredisë bankare.

Të dhënat zyrtare nga Buxheti i Shtetit tregojnë se Qeveria ‘Rama’, nëpërmjet Ministrisë së Infrastrukturës, ka kryer pagesat e plota për landfillin e Elbasanit, në vlerë totale 33 miliardë lekë të vjetra, si dhe shumicën absolute të faturave për landfillin e Fierit, për një total prej 41 miliardë lekë të vjetra.

Qeveria shqiptare ka vijuar të kryejë pagesat për Zoton e Gugalljan, megjithëse ata janë të shpallur në kërkim prej më shumë se një viti për korrupsion e pastrim parash. Kjo dëshmon se Zoto dhe Gugallja kanë marrë paratë, të cilat duket se janë zhdukur bashkë me arratisjen e tyre, ndërkohë që inceneratorët ende nuk funksionojnë