Kompania “3R”, e cila menaxhonte landfillin e Sharrës, nuk i kishte bërë asnjë trajnim punonjësit 17-vjeçar Ardit Gjoklaj, i cili u gjet pa jetë në vend-grumbullin e mbeturinave mëngjesin e 7 gushtit 2016.
Kompania private, me administrator kreun e Partisë Socialiste në Peqin, Edurim Teqja dhe me bekimin e kryebashkiakut të Tiranës, Erion Veliaj, ka funksionuar në shkelje të plotë të rregullave teknike.
Të paktën kështu ka konstatuar raporti hetimor i kryer për llogari të hetimit.
Në raport thuhet se askush nuk ka shkuar për të kontrolluar mënyrën e punës në këtë kompani. Edhe Bashkia e Veliaj nuk ka ushtruar kontroll për mënyrë se si kompania “3R” po zbatonte kontratënb e lidhur me të, e cila ka treguar vëmendje edhe për situatat më të rëndomta me shitësit ambulatorë.
Askush nuk do të mësonte të vërtetën e punësimit skandaloz pranë kompanisë “3R” nëse, në mesin e gushtit 2016, Ardit Gjoklaj do të vdiste, i shtypur nga një mjet i rëndë përpunues mbeturinash.
Vdekja e tij u hetua nga Prokuroria e Tiranës. Në dosje rezulton tërësisht e provuar se kompania administruese ka shkelur të gjithë rregullat ligjorë dhe teknikë në rastin e Ardit Gjoklaj. Por, për fat të keq, “3R” e Edurim Teqjas nuk është penalizuar në asnjë lloj forme, pavarësisht ngjarjes tragjike.
Prokuroria e Tiranës ka faktuar se Ardit Gjoklaj, ndonëse ishte i veshur me uniformën e punës që kanë punonjësit në këtë punë (ka pasur të veshura kominoshe dhe doreza, kepucë pune), nuk figuron të jetë pjesë e listës së punëtorëve që kanë marrë instruksion.
Gjithashtu, 17-vjeçari nuk është pjesë e listëpagesës së sigurimeve shoqerore dhe shëndetësore. Kështu Ardit Gjoklaj, duke mos qenë pjese e listës së punëtoreve që shoqëria “3 R” sh.p.k ka, automatikisht ai nuk figuron të jetë i pajisur me rregullat e sigurimit teknik në pozicionet e punës.
Pra, Ardit Gjoklaj është punësuar në të zezë dhe nuk ka marrë asnjë trajnim për mënyrën se si duhet të punojë në një sektor të vështirë dhe me rrezik të lartë për jetën dhe shëndetin. Kompania, dukshëm, nuk e ka parë të arsyeshme që ta regjistrojë si të punësuar dhe aq më tepër të merrte masat për sigurinë e tij.
