Biznesi i vogël është në krizë dhe kjo vjen si pasojë e një sërë masash fiskale dhe ligjore që ka marrë qeveria ‘Rama’ që kur është vendosur në pushtet. Më e përfolura ka qenë vendosja e Tvsh, e cila sipas shoqatës së biznesit të vogël do të rrisë me 200 mijë lekë në vit barrën e taksave për sipërmarrësit e vegjël.

Kjo ka sjellë rënie në shitje dhe pamundësi për të shlyer kreditë, fakt të cilin e deklaron edhe vet Banka e Shqipërisë ku tregohet se në gjashtëmujorin e dytë të vitit të kaluar bizneset e vogla kanë raportuar rënie të shitjeve dhe përkeqësim të gjendjes së tyre financiare. Në kushtet kur këto biznese përballen me rënie të xhiros, siç raporton BSH, kjo ka vënë në vëshritësi ndërmarrjet e vogla.    

"Barra e pagesës së huasë duket se rëndon më tepër tek ndërmarrjet e vogla, ku numri i ndërmarrjeve që raportojnë se pagesa e huasë e kalon 20% të të ardhurave zë rreth 27.4% të totalit të grupit," thotë raporti i fundit i Stabilitetit Financiar.

Mbyllje masive

Të dhënat zyrtare nga Drejtoria e Përgjithshme e Tatimeve tregojnë se nga fillimi i vitit deri më tani kanë kaluar në status pasiv rreth 5 mijë biznese. Kjo do të thotë se aktualisht në Shqipëri kalojnë në status pasiv mbi 57 biznese në ditë, një ritëm i paprecedentë.

Mbylljet masive të bizneseve lidhen veçanërisht me nismën e qeverisë për t'i futur ato në skemën e tatimit mbi vlerën e shtuar. Kjo masë, përveç rritjes së kostos ka trembur biznesin duke dekurajuar aktivitetin ekonomik. Ndaj mijëra sipërmarrës të vegjël duket se kanë preferuar që të mbyllin aktivitetin e tyre duke kaluar në status pasiv.