Nga Bujar Vreto

Institucionet qendrore dhe vendore ortakëri për shkatërrimin e faunës dhe florës.

Të dashur bashkëqytetarë të Bashkisë Librazhd, por dhe me gjerë, dua të ju informojë se ligji nuk zbatohet, por stimulohen sipërmarrësit për ta shkelur atë dhe këtë situatë të rëndë e krijon ortakëria e zyrtarëve kompetente me babëzinë e ndonjë biznesmeni.

Unë u alarmova kur me informuan se shtrati i lumit Rrapun (një perlë e vërtetë), është tharë tërësisht në një segment të rrjedhës se tij.

Menjëherë, shkova bashkë me stafin tim, por është shumë e vështirë për ta përshkruar gjendjen e rëndë se si ortakëria “pushtet-privat” e shkatërrojnë faunën dhe florën.

Dëmi është i pallogaritshëm dhe i dënueshëm.. po kush të llogarisë dëmin dhe të japë dënimin ata që janë pjesë e shkatërrimit, ata që deri dje laheshin me kallaje dhe tani lahen me vaska e qumësht, kush ta japë dënimin ata që pushimet i kalojnë në jahte dhe kanë harruar se ka lumenj si Rrapuni dhe Shkumbini që jo vetëm e zbukurojnë relievin tonë, por janë dhe vendet më të frekuentuara nga banorët që pushojnë gjate ditëve të nxehta.

A mendojnë këta kleptokratë se prishja e ekosistemit sjell pasoja të mëdha ekologjike, a mendojnë këta të pangopur se gjallësat e lumit janë shuar, a mendojnë këta mendjepak se gjarpri po shkon tek shtëpitë e banoreve, a mendojnë këta të pashpirtë se bagëtia, pemët, bujqësia do ujë, a mendojnë këta qafire se fëmijët dhe brezat e ardhshëm do vuajnë pasojat e ligësisë dhe grykësisë te drejtueseve te sotëm.

Unë në cilësinë e anëtarit të këshillit Bashkiak, kryetarit të opozitës, por dhe si qytetar i Bashkisë Librazhd, që dua vendin tim dhe s’kam ndërmend të largohem nga këtu. BEJ THIRRJE pushtetit vendor dhe konkretisht të emëruarit të Taulantit që sot drejton bashkinë, por edhe kryetarit të grupit parlamentar të mazhorancës (vetë Taulantit), që gjejnë kohën për shallin e pionierit dhe fotot e kriminelit Enver të distancohen publikisht për këtë krim mjedisor në qoftë se nuk janë ortakë me krimin, të kërkojnë pranë institucioneve përkatëse të merren masat e menjëhershme që në shtratin e lumit Rrapun të lejohet nga kuçedra 30% e ujit të rrjedhshëm sipas ligjit si dhe të vihen para përgjegjësive juridike të gjithë abuzuesit e përfshirë në këtë ngjarje të rëndë. Për besueshmërinë e shkrimit, ilustrojmë me foto nga vendi i skandalit mjedisor. Autori është kryetar i Degës së PD Librazhd