Përfaqësuesit e Ambasadës Greke largohen, Idrizi: Akt i paprecedentë

Baneri për Çamërinë u rivendos të stenda ku shiteshin librat e Shtëpisë Botuese “Çamëria”, pas ndërhyrjes së Shoqatës Patriotike “Çamëria” dhe PDIU-së.

Ndërkohë përfaqësuesit e Ambasadës Greke, të cilët bën presion për heqjen e këtij baneri, u larguan. Kryetari i PDIU-së Shpëtim Idrizi, tha se heqja e banerit të Çamërisë nga Panairi i Librit te Muzeu Kombëtar, është një akt i rëndë, për të cilin ministri i Jashtëm Ditmir Bushati, duhet të reagojë.

“Është një akt i paprecedentë dhe i bëj thirrje direkte ministrit të Jashtëm  Ditmir Bushati, të angazhohet personalisht sepse është folur në emër ministrit Bushati për marrëveshjen politike me ministrinë e Jashte të shqipërisë për të hequr kudo që të jetë emri i Çamërisë. Unë kërkoj që ose ministria e Jashtme ta përgënjeshtrojë këtë gjë ose të thërras përfaqësues të ambasadës Greke të cilët kanë folur me këtë gjuhë të cilin ma ka konfirmuar edhe organizatori i panairit të librit”, - tha z.Idrizi.

Përfaqësuesit e Ambasadës Greke u larguan edhe nga stendat e Panairit të Librit, ku kishin planifikuar të qëndronin për disa ditë.

Ky reagim vjen kur PDIU dhe Shoqata “Çamëria” po organizojnë Javën Çame dhe kanë paralajmëruar marrshimin gjigand në Qafë-Botë me rastin e 27-qershorit, ditës së përkujtimit të Genocidit mbi Shqiptarët e Çamërisë.