Anijet e peshkimit paguajnë një kosto prej afro 7 milion euro në vit për riparim dhe mirëmbajtje, proces të cilin e kryejnë në Itali dhe Greqi, për shkak se në vend mungojnë kantierët e riparimit. Tek pjesa e kostos, përveç karburantit, përfshihet edhe koha e lundrimit si dhe qëndrimi i peshkatarëve për disa ditë në vendet fqinje.

Përfaqësues të Ministrisë së Bujqësisë bëjnë me dije se për t’i dhënë zgjidhje kësaj problematike të theksuar që rëndon mbi peshkatarët, po shikohet mundësia që brenda 6 muajsh të ndërtohen kantierët e riparimit.

Aktualisht pranë ministrisë janë depozituar 4 kërkesa për investime, të cilat do të bëhen përmes kontratave të zgjatura dhe arrijnë vlerën e mbi 1 milion eurove. Përfaqësues të Ministrisë bëjnë me dije për TV SCAN se është në përfundim procesi i regjistrimit dhe i hipotekimit të pronave të peshkimit, që do t’i japë mundësinë Ministrisë që të vërë në dispozicion për investitorët hapësirat e porteve me një qira minimale dhe tarifa të përcaktuara.

Është menduar që shkallët e reja të riparimit të ndërtohen mbi ato ekzistuese, në Vlorë, Shëngjin dhe Sarandë.  Aktualisht është vetëm një kantier funksional në Pashë Aliman, i cili nuk përballon anijet, si nga numri por edhe nga madhësia.

Ndërtimi i shkallëve të reja pritet të ketë impakt ekonomik, jo vetëm në lehtësimin e kostove për peshkatarët por dhe në punësim. Flota e peshkimit në vend ka një moshë mesatare 39-vjeçare, dhe si e tillë nevoja për mirëmbajtje dhe riparim është tejet e lartë. Ndërsa mosha mesatare e anijeve në Bashkimin Europian është 21-25 vjeçare.