Detaje të reja dalin në dritë nga operacioni i policisë greke e cila sekuestroi 200 kg marijuanë në kufirin greko-shqiptar.

Nga ana e saj policia shqiptare bën me dije se jane sekuestruar rreth 198 kilogramë kanabis në Igumenicë e cila kishte hyrë përmes kufirit shqiptar dhe janë vënë në pranga dy grekë.

Shërbimet e Policisë Kufitare të Livadhjasë, Sarandë gjatë patrullimit në kufirin jeshil, nëpërmjet mjeteve logjistike kanë konstatuar disa persona të cilët po transportonin çanta të dyshuara me lëndë narkotike në drejtim të piramidave P.51 e P.52.

Menjëherë Policia Kufitare e Livadhjasë ka kontaktuar me Policinë e Igumenicës, të cilët janë vënë në lëvizje duke mbajtur në monitorim zonën.

Ndërkohë nga ana e Shërbimeve të Stacionit të Livadhjasë u organizuan shërbime si dhe krehje territori në bashkëpunim edhe me grupin operacional.

Falë shkëmbimit të informacionit dhe koordinimit të veprimeve, mëngjesin e sotëm në vendin e quajtur “Dhafni” Filat, Policia e Igumenicës ka kapur 2 shtetas grekë, konkretisht E.K., 50 vjeç banues në Trikalla dhe G.S., 51 vjeç, banues në Athinë, të cilët transportonin me një mjet “Mercedes”, të marrë me qira nga shtetasi E.K., rreth 198 kilogramë lëndë narkotike.

Po bashkëpunohet me palën greke për të identifikuar dhe kapur shtetasit shqiptarë që dyshohet se u kanë shitur lëndën narkotike dy shtetasve grekë.