Në Gjykatën e Catanias është zhvilluar sot një seancë parapërgatitore në ngarkim të grupit italo-shqiptarë drejtuar nga Moisi Habilaj.

Mësohet se në sallë ka qenë prezent Habilaj. i transferuar nga burgu me mjete të blinduara dhe një eskortë policore e përforcuar. Ai, nëpërmjet avokatit të tij ka kërkuar gjykim të shkurtuar. Po kështu edhe Nezar Seiti ka kërkuar gjykim të shkurtuar.

Në sallën e gjyqit ishin të pranishëm shumë familjarë të të arrestuarve disa prej tyre ardhur enkas nga Shqipëria. Pas një debati mes avokatit të njërit prej të arrestuarve italianë, Gjykata e shtyu seancën për në 26 shtator 2018, ku do të vendoset nëse do të pranohet kërkesa e këtij të pandehuri për një gjykim të shkurtuar.

Sipas procedurës gjykimi shkurtuar parashikon mos shtimin e provave të reja përveç atyre që janë aktualisht në dosje. Kjo i mundëson të pandehurit dënim më të ulët. Moisi Habilaj gjatë të gjithë seancës, e cila ka zgjaur më shumë se 2 orë, u shfaq i qetë madje duke qeshur bashkë me të arrestuarit e tjerë.

Në një moment ai ka përshëndetur të gjithë të pranishmit në sallë. Edhe avokati Moisi Habilajt ka kërkuar gjykim të shkurtuar për klientin e tij. E njëjta kërkesë u përsërit edhe nga avokatët e tjerë.