Për të muzika jazz është një mënyrë jetese, është muzika rebele që ashtu sikurse edhe ai, tenton të sjellë progres në këtë gjini. Markelian Kapidani, kompozitori i njohur i Festivaleve të Radiotelevizionit Shqiptar, vështirë ta konceptojë një ditë të tijën pa notat e muzikës jazz, sepse janë ato që ngjyrosin çdo ditë botën e tij.

“Jazzi është mënyrë jetese, që do të thotë eksperiencë jete. Eksperienca e jetës është e të gjitha fushave, mbart me vete historitë e jetës, hallet, gëzimet. Kjo është edhe pikënisje për një muzikë të tillë, ku muzikanti luan në instrument, shpreh në moment atë çfarë ndien. Ne nuk bëjmë plane afatgjata normalisht, në përgjithësi e marrim jetën ashtu si vjen dhe në njëfarë mënyre improvizojmë, kur na dalin probleme ne kërkojmë mënyra për t’i kapërcyer dhe kështu jeta është një lloj improvizimi si puna e jazzit”, shprehet kompozitori.

Në venat e Markelianit, jazzi u injektua shumë herët, që kur ishte ende fëmijë. Në vitet ‘60-’70 orkestrinat muzikore në qytetin e Shkodrës luanin muzikën e pasluftës, muzikë të lehtë dhe jazz.

Në njërën prej tyre interpretonte edhe babai i tij, Gjon Kapedani, ndaj kjo është edhe arsyeja pse në qytetin e lindjes ai sjell për të 9-in vit radhazi “Shkodra Jazz Festival”, nga data 29 gusht deri më 2 shtator.

“Në këtë festival, përveç mysafirëve muzikantë që vijnë nga jashtë, ku luhet në salla, në teatro apo edhe në clube, në këtë edicion kemi edhe klasën e jazzit “Rrok Jakaj”, violinisti, i cili ideoi këtë festival. Kemi dy aspekte: aspektin e jazzit, por edhe atë të muzikës klasike, kryesisht me harqe. Kjo është risia”, shprehet Markelian Kapidani.

“Shkodra Jazz Festival” synon të jetë në vitet në vijim një festival ‘on tour’, për të çuar muzikën jazz në çdo qytet.