Çmimi i Bibliografisë “Lumo Skëndo” për vitin 2017, i cili cdo vit ndahet nga Biblioteka Kombëtare e Shqipërisë i ka shkuar këtë vit Shtëpisë botuese “Kuteli” me motivimin: për botim e hijshëm e nostalgjik, ilustruar grafikisht nga mjeshtri Gazmend Leka, të përmbledhjes me rrëfenja “Tregime të moçme shqiptare”, një prej veprave më mbresëlënëse e më të dashura të letërsisë shqipe të çdo moshe, trashëgim monumental nga pena e rrëfimtarit mjeshtëror Mitrush Kuteli.

Drejtoresha e Bibliotekës Kombëtare, Persida Asllani, i dorëzoi çmimin së bijës së shkrimtarit Atalanta Paskos, themeluese e Shtëpisë botuese “Kuteli” . “Në këtë botim janë bashkuar disa vlera, ajo grafike dhe e ilustrimit me rrëfimtarinë dhe tregimet, por edhe përkushtimi dhe puna e palodhur e Elzana Agollit dhe shtypshkronjës “Mali Pleshti”, që solli këtë botim cilësor”, tha Pasko.

Edicioni i vitit 2017 i përmbledhjes “Tregime të moçme shqiptare” nga shtëpia botuese “Kuteli” është një botim special që përkon edhe me 110-vjetorin e lindjes së shkrimtarit. Këtë vit çmimi i Bibliografisë u përmbyll pas një seri veprimtarish kushtuar figurës dhe personalitetit të kulturës Mid’hat Frashëri, apo “Lumo Skendo”, pseudonimi letrar me të cilin ai u identifikua kulturalisht gjatë gjithë krijimtarisë dhe veprimtarisë së tij letrare e botuese ashtu edhe patriotike, shkencore e diturore.

Biblioteka Kombëtare hapi veprimtaritë kushtuar veprës së tij duke risjellë në duar të studiuesve dhe lexuesve revistën “Diturija” në një botim bibliofilik e anastatik. Kontributit të Lumo Skendos si themelues të kësaj reviste “Monument kulture” i trashëgimisë sonë të përbashkët iu kushtuan dy konferenca shkencore të organizuara nga dy Bibliotekat Kombëtare të Shqipërisë dhe të Kosovës si dhe një bibliografi e hartuar posaçërisht për revistën “Diturija” nga specialistët e BKSH.

Ceremonia u zhvillua në sallën elegante e precioze të Bibliotekës Kombëtare që mban pikërisht emrin “Lumo Skendo”. Çmimi Kombëtar i Bibliofilisë “Lumo Skëndo” nga viti 2013 i është besuar Bibliotekës Kombëtare të Shqipërisë. I akorduar për herë të parë në vitin 2006, është çmimi i vetëm që nxit dhe mbështet cilësinë estetike të botimeve shqiptare.

Ky çmim i shërben vlerësimit dhe stimulimit të botimeve me vlera të spikatura bibliofilike dhe intelektuale, nëpërmjet evokimit të personalitetit të kulturës dhe të mendimit shqiptar Lumo Skëndo (Mit’hat Frashëri), veçanërisht si themelues i bibliofilisë shqiptare.

Mbas ceremonisë së Çmimit të Bibliofilisë “Lumo Skendo” 2017 në Sallën Franceze të Leximit u zhvillua Forumi “Poetika shqipe-trashëgimia shqipe” me rastin e botimit të librit Testamenti i akademik Sabri Hamitit, botim i Akademisë së Shkencave dhe Arteve të Kosovës, me pjesëmarrjen e akademikes Floresha Dado dhe studiuesve të njohur Bashkim Kuçuku, Nysret Krasniqi, Dhurata Shehri, Kastriot Gjika etj. Libri “Testamenti” vjen si një reflektim i vijueshëm me shkrime kritike për letërsinë shqipe, të shkruara gjatë këtyre viteve të fundit nga autori.

Këto shkrime klasifikohen prej tij në tri pjesë: I. Lirika shqipe, II. Leksione dhe III. Testamenti, që me ide e procedime letrare lidhen domosdoshmërisht në një sistem me librat pararendës të tij si: Bioletra, Tematologjia, Albanizma, Utopia letrare. Me këtë libër të fundit ai përmbyll “pesëlibërshin” që synon titullin e përbashkët “Poetika shqipe” apo, siç e shpreson vetë autori “një filozofi të letërsisë”.