Në orën katër të pasdites, kur shitësi i librarisë “Fnac” në Champs Elysées hap sirtarët për të mbushur raftin e librave në vitrinë, zbulon se ai është i boshatisur.

Michel Houellebecq por shet më shumë nga ç’parashikohej. Dy burra rreth të dyzetave marrin një nga kopjet e fundit të librit “Serotonina”, promovuar disa ditë më parë. Ata nuk duan të japin shumë arsye për blerjen e tyre. “Nuk mund të flasim, jemi ushtarë”, thonë. Ndërkohë flet me shumë përzemërsi Agnes, një grua simpatike pesëdhjetëvjeçare. Ka ardhur nga provinca, nga Rueil-Malmaison, së bashku me bashkëshortin për një xhiro në qendër, ndërsa kur hyn në librari, idetë i ka të qarta. “Houellebecq më pëlqen, sepse është intrigues dhe mbi të gjitha realist.” Realist? Por sa libra i keni lexuar atij? “Kam lexuar Nënshtrimin.” Dhe ju mendoni se vërtetë fundamentalizmi islamik mund të marrë pushtetin në Francë, mendoni se bëhet fjalë për një hipotezë realiste? “Besoj se ekziston një problem i rëndë me fundamentalistët”. Që Houellebecq mund të konsiderohet një profet, që ka aftësinë për t’i paraprirë problemeve të pazgjidhura të shoqërisë francezë, tashmë është një ide e përhapur dhe e pranuar.

Megjithatë, duhet thënë se nuk do ta gëzonte këtë famë sikur libri i tij “Nënshtrimi” të kishte dalë në librari më 7 janar 2015, ditën e atentatit ndaj redaksisë së Charlie Hebdo. Në atë atentat, Houellebecq humbi një ndër miqtë më të mirë, Bernard Maris dhe më pas u arratis për disa kohë në Irlandë, jo vetëm për arsye sigurie.

Është e vërtetë se shkrimtari mori disa kërcënime të njëpasnjëshme, por edhe vetë u trondit nga koicidenca e frikshme mes librit të tij dhe ngjarjes së që ndodhi. Por ajo që ndodhi me “Nënshtrimi”, ndodhi edhe tani me “Serotonina”. Houellebecq dorëzoi dorëshkrimin e romanit në shtëpinë botuese Flammarion në fund të verës së vitit 2018, kur asnjë nuk e çonte ndër mend se jeta politike franceze shumë shpejt do të tronditej nga revolta popullore, nga jelekverdhët siç quhen tani, nga banorët e zonave rurale që kërkojnë të hakmerren ndaj privilegjeve të qyteteve të mëdha, ose më mirë, ndaj Parisit.

Kjo ndoshta është edhe arsyeja kryesore se përse lexuesit po shpejtojnë ta blejnë romanin e tij të fundit, ndoshta presin një përgjigje nga “profeti” Houellebecq.