Thurja e muzikës popullore me jazz, është përshkrimi më i thjeshtë që mund t’i bëhet koncertit “Event 55” të shtunën mbrëma në teatrin “Oda”.

Ai ka ardhur si një lloj misioni më vete: të hapë horizonte të reja për folkun e jo vetëm të sjellë një mbrëmje etno-jazzi. Se koncerti do të jetë shumëngjyrësh në tinguj e në repertor, paralajmërim ka qenë edhe skena me reflektorë ngjyrash të ndryshme, ku dalloheshin lloj-lloj instrumentesh prej sharkisë, çiftelisë, kavallit e lodrës deri te kitara, bateritë, pianoja, kontrabasi.

Nuk kanë qenë vetëm instrumentet ato që kanë përtërirë të kaluarën në kombinim me të tashmen, por edhe interpretimi i këngëve nga solistët.

“Më qanë zemra” ka qenë ajo me të cilën është hapur koncerti, një këngë e vjetër popullore, që për gjeneratën e re mund të jetë e largët.

Me “Event 55” njëherësh është shënuar 55-vjetori i instrumentistit shumëvjeçar të instrumenteve me tela si çifteli e sharki, Afrim Sadiku, i cili ka vendosur që të mos festojë vetëm me familje, por bashkë me publikun e gjerë. Emra të njohur të jazz-skenës vendore, si Ilir Bajri në piano e Armend Xhaferi në kitarë janë bërë tok në këtë nismë.

Një kthesë interesante ka qenë interpretimi i këngës popullore “Prej nji shpati” nga rapsodët Mustafë Ramaj dhe Cenë Vishaj, të cilët ani pse të veshur alla franga, shoqëruar edhe nga Gëzim Sadiku (llahutë e çifteli) kanë sjellë tingujt e atyre që dikur këndoheshin nëpër oda.

Se muzika popullore mund të ketë të ardhme e aso që e trashëgojnë, dëshmi ka qenë solistja Agona Shporta me interpretimin e “Mahmudisë”.