Shpeshherë artistët shprehen se politikanët po përpiqen ti zënë vendin e tyre duke bërë teatër. Por regjisori nga Maqedonia, Qëndrim Rijani thotë se arti dhe teatri janë nivel aq i lartë sa nuk arrihet dot nga politikanët.

"Teatri dhe arti janë aq shumë nivel i lartë sa janë të paarritshëm për politikanët. Nuk mund ta arrijnë qoftë me përgatitjen e skenarëve të tyre apo me imagjinatën e tyre në nivelin sa të mund të bëjnë teatër. Ata bëjnë një lloj shoëbizz-i. Ky është problemi ynë si popull, ndoshta na pëlqen, ndoshta politikanë e kanë gjetur pikën për të qenë më afër nesh,"-tha ai.

I ftuar në emisionin Tempora në RTV Ora, Rijani shtroi pyetjen se ku ndodhet gjenerata e artistëve që dridhin qerpikun e politikanëve me deklartat e tyre.

Qëndrim Rijani: "I kam bërë një pyetje vetes: Ku është gjenerata e mesme e artistëve revolucionare dhe të kultivuar të mendimit të fuqëishëm të ciliët të paktën të shkakojnë një dridhje të qerpikut me një deklaratë të tyre. Jam përpjekur ta gjej brenda vetes. 

Problemi është tek ne. Në kohën që duhet të punonin për ndërtimin e gjeneratës së dytë, të tretë  dhe sot të ishim mosha mesatare e individëve të aritit që dridhin qerpikë politikanësh ne akoma vazhdojmë të merremi me nostalgjinë e figurave që prodhoi ish sistemi. Prap kthehemi tek emrat e filmave para '90. Problemi është se nuk arritëm të këto 30 vite krijojmë figura që do ishin gjenerata pasuese e tyre."

***

Qëndrim Rijani: "Aq shumë është kthyer jeta në një lloj teatri saqë kam përshtypjen se jeta e vërtetë nuk ekziston. Koha në të cilën jetojmë ne, shqiptarët, më e vërtetë është në teatër sesa në jeta e përditshme."

Regjisori, i cili do vendosë operën Skënderbeu në teatrin e Operës në Shkup, tha se Shqipëria ka prodhuar shumë emra të mëdhenj, rrugën e të cilëve po e ndjekin popujt e tjerë por jo shqiptarët.

Qëndrim Rijani: "Kam dy vite që po punoj me një opera që do jetë opera e Skënderbeut në Maqedoni, opera e parë shqiptare dhe jam marrë shumë me historinë e Skënderbeut. Ne flasim për Evropën. Por ajo Evropa që sot ekziston hedh hapat në rrugën që i ka shtruar Skënderbeu jonë. Dhe ne jemi ato njerëz që kemi prodhuar, nxjerrë nga vetja jonë njerëz aq të mëdhenj që shtrojnë rrugët e popujve të tjerë dhe ne vetë nuk po ndjekim rrugët që na i kanë shtruar ata. Popujt e tjerë ndjekin rrugën e njerëzve tanë të mëdhenj."

***

Ndërsa theksoi se duhet të hiqen festivalet garuese.

Qëndrim Rijani: "E rëndësishme për mua dhe gjithë regjisorët e artistët është e rëndësishme prezantimi i tyre në çdo cep sepse teatri nuk duhet të ndodhë vetëm në Tiranë por gjithandej, edhe nëpër fshatra. Ne kemi nevojë për revolucion estetik. Duhet të heqim të gjitha festivalet garuese."

Rijani shtoi se artistët nuk duhet të flasin për arritje për sa kohë vazhdojnë të konkurrojnë brenda tokës shqiptare.

Qëndrim Rijani: "Dua që shfaqjet e mia të jepen në festivale. Pavarësisht se ne flasim për arritje, nuk ia them as vetes, por ne në përgjithësi nuk mund të themi arritje kur vazhdojmë të konkurrojmë brenda shqiptarisë, brenda tokës sonë shqiptare. Është çudi e madhe nëse arrijmë të shkojmë deri në Rusi me një shfaqje sot në 2019. Nuk është çudi kjo. Është arritur të shkohet edhe para 40 vitesh."