Një shfaqje e re teatrale do të shfaqet në skenën e Teatrit Kombëtar. “Galaksia, skena nga një ekzekutim!” e Barkerit. Vatra e artit po ushqehet me dru për të mos u shuar, nga ata dhjetëra artistë që qëndrojnë aty ditë natë në roje të godinës historike, tek të cilët nuk ka të lodhur dhe as të reshtur, as pas 2 vjetësh, zemërata, indinjata dhe protesta ndaj qeverisë “Rama”.

Aktori Neritan Liçaj, një nga mbrojtësit më të famshëm të kauzës, edhe sot ia ka drejtuar sokëllimën kryeministrit në godinën e qeverisë vetëm disa metra përtej bulevardit: “Mjeranë, arti në shekuj ka fituar mbi ju” dhe i ka bërë një ftesë të fuqishme, të gjithë adhuruesve të Teatrit Kombëtar, jo pa arsye.

“Pikërisht në këtë kohë mjerane, kur mjeranë tentuan të shfarosin artin dhe kulturën nga faqja e Tiranës dhe e Shqipërisë, vjen kjo shfaqje!-  na thotë ai. - "Galaksia, skena nga një ekzekutim". Lufta e pushtetit kunder artit! Këtë trajton autori Barker.

Mjeranë! Arti në shekuj ka fituar mbi ju! Sepse arti ka lindur me njeriun dhe nga njeriu, për të thënë të vërtetat e tij.Te vërteta që ju mpijnë, ju frikësojnë dhe ju marrin shpirtin. Jeni shumë të vegjël para artit, ju!

Ejani shiheni në këtë shfaqje të enjten, të premten, të shtunën dhe të dielën…në orën 19.00 nga trupa e Teatrit Kombëtar,” na hap dyert Liçaj