Kryetari i Bashkisë së Tiranës, Erion Veliaj, ka gjetur rastin për të dalë edhe një herë në televizor, duke shfrytëzuar imazhin e yjeve të muzikës shqiptare, të cilët, me siguri i ka paguar “sa frëngu pulën”. Se sa është fatura e këtij koncerti vetëm ai e di, kur fare mirë këto para mund të përdoreshin për të përmirësuar nivelin e jetesës së komunitetit e votuesve të tij.
Në ditën ndërkombëtare të punëtorëve, 1 Majin, në “Sheshi Skënderbej” ai organizon një koncert për të harruar papunësinë, mjerimin dhe varfërinë e qytetarëve të tij, pasi i ka ngopur ata me taksa e propagandë boshe. Sipas Veliajt, disa nga zërat më të pëlqyer nga të rinjtë si: Ledri Vula, Arilena Ara, Yll Limani, Alban K. Ramosaj, Filloreta Raci, Argjentina Ramosaj, DJ ALDO “do të ndezin” sot sheshin më të madh të shqiptarëve me muzikën e tyre moderne, në një koncert që pritet të fillojë rreth orës 19:00. Ky koncert nuk është as më shumë e as më pak vetëm reminishencë e së kaluarës komuniste kur 1 Maji shallej festë dhe punëtorët e “kënaqur” marshonin para udhëheqjes e diktatori mbante fjalime. Vetëm parada mungon, por nuk do mungojë fjalimi i Erionit, dhe premtimet e tij për Tiranën e së nesërmes.
