Komisioneri evropian për çështje që lidhen me migracionin, Dimitri Avramopolus, e ka pritur me shumë gëzim vendimin e Komitetit për Liritë Qytetare, Drejtësi dhe Çështje të Brendshme – LIBE, pro liberalizimit të vizave për qytetarët e Republikës së Kosovës.

 “Mirëseardhje për një dritë të gjelbër të fuqishme nga Komiteti LIBE për të filluar negociatat me Këshillin e Evropës  për liberalizimin e vizave për Kosovën. Shpresoj se ky vendim së shpejti do të jetë për të gjithë rajonin e Ballkanit Perëndimor për lëvizje të lirë pa viza”, ka shkruar Avramopolus në  llogarinë e tij në Twitter.

Me 30 vota për, 10 kundër dhe 2 abstenime, ky komitet i PE-së ka kaluar çështjen e liberalizimit për kosovarët te Parlamenti Evropian dhe Këshilli për Marrëveshje Ndërinstitucionale për Liberalizim.

Pas këtij vendimi ndërkohë kanë reaguar edhe liderët politik kosovar, të cilët kanë thënë se liberalizimi i vizave do të ndodh shumë shpejt.

Kryetari i Kuvendit, Kadri Veseli, ka thënë se Kosova do të marrë liberalizimin e vizave brenda këtij viti.