Qendra Kosovare për Studime të Sigurisë (QKSS) inkurajon Kuvendin e Kosovës që të procedojë me miratimin e pakos së Ligjeve për FSK-në në leximin e dytë dhe rrjedhimisht t’i hap rrugë tranzicionit të FSK-së në mandat mbrojtës.

“Konsiderojmë se ky është një proces i logjikshëm shtet-ndërtues për të cilin është punuar intenzivisht gjatë pesë viteve të fundit. Është tejet e rëndësishme që ky proces të mos instrumentalizohet për përfitime personale e politike mirëpo të transmetohet si një arritur nacionale me benefite për Kosovën, rajonin dhe më gjerë. QKSS fton institucionet që me gjakftohtësi ti rezistojnë presioneve nga ana e disa shteteve të cilat këtë tranzicion e shohin me skepticizëm. Rikujtojmë se QKSS që nga viti 2015 ka paralajmëruar që forma e tranzicionit të FSK-së përmes ndryshimeve të Ligjeve është formë komplet e ligjshme dhe legjitime. Qëndrimet e NATO-s nuk mund të reflektojnë qëndrimin e aleancës e cila e ka vendim-marrjen në bazë të konsensusit e ku një shumicë e shteteve anëtare të NATO-s e përkrah këtë proces si një të drejtë të Kosovës dhe, para së gjithash, një benefit p ër NATO-n e cila do ta konsideron storien e saj të suksesit në Kosovë vetëm atëherë kur len si pasardhëse një forcë mbrojtëse, e aftë për të ofruar siguri për të gjithë qytetarët”, thuhet në kumtesën për media.

Tutje, QKSS ka shprehur dëshpërim me qëndrimin e Spanjës dhe të disa shteteve tjera të cilat vazhdojnë të punojnë aktivisht në dëm të anëtarësimit të Kosovës në organizata ndërkombëtare.

“E njëjta vlen edhe për NATO-n ku perspektiva e tanishme e Kosovës është pothuajse inekzistente përderisa katër shtete anëtare ende nuk e kanë njohur Kosovën. Konsiderojmë se shumë shtete jo vetëm se në vazhdimësi ekzagjerojnë nevojën për një stabilitet nominal mirëpo edhe së voni po binë pre e një makinerie të lajmeve të rrejshme e cila ka për qëllim krijimin e frikës dhe pasigurisë sidomos në veri të vendit.  Tranzicioni i FSK-së në ushtri nuk do të ketë impakt të menjëhershëm përderisa është një proces që do ti merr 7-10 vite. Ndërtimi i kapaciteteve të saj sigurisht se pritet të bëhet bazuar në mbështetjen bilaterale të shteteve përderisa NATO, ashtu sikurse në rastin e mandatit aktual, ka një hapësirë shumë të ngushtë veprimi për shkak të mungesës së konsensusit. Mandati i kufizuar për qëllime të vetëmbrojtjes është në shërbim të ruajtjes së paqes, jo luftës”, thuhet në njoftim