Kryetari i Lidhjes Demokratike të Kosovës, Isa Mustafa, i kërkoi Lëvizjes Vetëvendosje që të lexojë qartë rezultatin e zgjedhjeve të 6 tetorit, në mënyrë që të arrijnë një marrëveshje të balancuar për qeverisje. Sipas kreut të LDK-së, dy partitë janë gati të barabarta, dhe për këtë arsye në arritjen e koalicionit të ardhshëm qeverisës duhet të përfshihen gjitha postet institucionale, përfshirë postin e Presidentit. Deklaratat i bëri me rastin e 30-vjetorit të themelimit të LDK.

“Ne besojmë se edhe Lëvizja Vetëvendosje duhet të lexojë qartë rezultatet dhe të pranojë se jemi subjekte gati të barabarta që kemi dal nga zgjedhjet. Me një diferencë prej një deputeti për të cilin ne jemi pajtuar që parimisht pozita e Kryeministrit t’i takojë partnerit tonë që nga hyrja në fushatë në këto zgjedhje”, tha Mustafa.

Posti i Presidentit është ai që po pamundëson krijimin e një qeverive mes LDK dhe Ventëvendosjes. Duke kujtuar historikun e partisë që nga koha e para luftës, Mustafa thotë se nuk e meritojnë presionin publik dhe mediatik. Përballë situatës së krijuar, ai i bëri thirrje partisë për unitet dhe tejkalim të ambicieve personale.

“LDK ka nevojë për unitet që ambiciet personale dhe diversitetin natyror të mendimeve duhet të kalojmë ndryshe, e jo përmes përçarjeve brenda subjektit tonë”, tha ai. Në jubileun e 30 të themelimit të LDK-së, Mustafa kërkoi edhe zbardhjen e vrasjeve të zyrtarëve të kësaj partie, ku tha se zbardhja e rasteve është borxh dhe detyrim për të ardhmen e Kosovës.