Nga Kastriot Dervishi

Në çdo fjalim publik të kohës Ramiz Alia fliste për Kosovën, sikur gjasme interesohej shtetit shqiptar, etj, por në takimin e datës 8.1.1991 me ambasadorin jugosllav Predrag Pjaniç me rastin e dorëzimit të letrave kredenciale, foli ndryshe. Kjo bisedë nuk iu transmetua shtypit përveçse si lajm i thatë. Alia tha se Kosova nuk është çështje e Shqipërisë, ishte problem jugosllav. Biseda është e gjatë. Në të ishte i pranishëm edhe ministri i Punëve të Jashtme të Shqipërisë, i cili e theksoi se Shqipëria nuk kishte pretendime territoriale ndaj Jugosllavisë. Komunistët mbeteshin njësoj në aktet e tyre antikombëtare, pavarësisht nga vitet. Internacionalizmi ishte gjithnjë në lartësinë e duhur.

Pjesë nga biseda Alia-Pjaniç

Ramiz Alia: ...Thjesht ne jemi të interesuar që midis Shqipërisë e Greqisë të ketë marrëdhënie të mira. Është siç kemi me ju problemin e Kosovës, grekët kanë problemin e minoritetit në Shqipëri. Por unë mendoj se nuk është ndonjë problem i vështirë, bile si e gjykoj unë, më tepër se 5 minuta nuk do t’i kushtojmë kujdes këtij problemi, sepse në fakt, nuk ekziston ndonjë problem. Unë do të dëshiroja që këto marrëdhënie të vazhdojnë edhe me Jugosllavinë, që zë ¾ e kufirit shqiptar, përveç faktit që janë 2 milionë e ca shqiptarë që jetojnë në trojet e tyre atje. Ju thatë që jeni gati të bisedoni për çështjen e Kosovës me Shqipërinë. Nuk është problem midis Shqipërisë e Jugosllavisë Kosova. Ky është mendimi im, pikëpamja ime. Ajo bëhet problem midis Shqipërisë e Jugosllavisë, por çështja e Kosovës, në radhë të parë, është problem i Jugosllavisë.

Ambasadori: Jam dakord me ju.