Nga Kastriot Dervishi

Për një veprim që nuk mund të ishte objekt i një çështje penale, një nëpunës u burgos. Ai ra në sy gjatë ceremonisë së rënies në gjunjë para shtatores së Stalinit dhe u dënua me burgim. Vdekja e Stalinit më 5.3.1953, u përjetua me shumë emocion dhe nderim të madh në Shqipëri. Edhe proceset politike ishin pjesë e këtij përjetimi. Loro Bytyçi arrestua më 13.3.1953. në vendimin e gjyqit të tij, ndër të tjera thuhej:

“Nga studimi i çështjes del se i gjykuari Loro Bytyçi, ka agjituar dhe propaganduar kundra pushtetit për të dobësuar pushtetin popullo. Ai ka komentuar lajmet që jepeshin nga radio reaksionare në disfavor të pushtetit popullor, duke thënë se fillimi i një lufte të tretë botërore do bjeri përmbysjen e qeverisë komuniste. ka biseduar me persona të ndryshëm mbi pakënaqësitë që kishte në lidhje me pushtetin popullor, duke shfaqur urrejtje. Vdekjen e shokut Stalin e ka komentuar si një gjë të mirë në favor të reaksionit ndërkombëtar”.

Gjykata Popullore e Rrethit Tiranë, me vendimin nr.406, datë 29.7.1953 e deklaroi fajtor në bazë të neneve 72 e 83 të Kodit Penal, duke e dënuar me 9 vjet burgim dhe konfiskimin e pasurisë. Me vendimin nr.1725, datë 25.9.1953 Këshilli Gjyqësor i Kolegjit Penal të Gjykatës së Lartë, i uli vetëm një  vit burgim.