Më 15 tetor shokët "veteranë" dhe shoqëruesit e tyre politikë përkujtuan ngjarjen e radhës që na ka lënë regjimi komunist, "çlirimin" e Fierit. Në dokumente të kohës nuk rezulton kurrsesi të jetë zhvilluar ndonjë qëndresë për të mbajtur Fierin sepse dihej që ushtria naziste kishte filluar prej muajsh tërheqjen nga Ballkani dhe nuk kishte asnjë synim të rrinte në Fier. Një trakt komunist i datës 28.10.1944, përmban më shumë propagandë se sa jep ndonjë fakt. Këtu thuhet se ishin partizanët e Grupit të Mallakastrës që luftuan (jashtë qytetit gjithsesi), ndërsa në librin me ngjarje e data të vitit 1971 thuhet se partizanët e Brigadës së 16-të, "çliruan" Fierin. Tani që të jemi të qartë, këta të brigadës të cilët nderohen sot për "heroizmin" e tyre, pse nuk zihen fare me gojë në këtë traktin e vitit 1944?! Kalimi i ndonjë triçikli anash një qyteti nuk përbën as pushtim dhe as çlirim.