Çdo datë e trashëguar nga regjimi komunist, sidomos ato çlirimet imagjinare që godisnin bishta autokolonash, nuk duhet marrë në konsideratë. Për Lushnjën mbahet si datë “çlirimi” 18 tetori 1944. Kjo është edhe në botimin me ngjarje të vitit 1971, te i cili nuk jepet asgjë përveç kësaj date. Mirëpo sipas historikut të Brigadës së 8-të, vërehet me lehtësi se nuk bëhet fjalë për ndonjë luftë në qytet, por për një autokolonë që po kalonte nëpërmjet Lushnjës për të ikur në drejtim të veriut, e cila ka kaluar me 200 makina, 8 autoblinda, 6 tankse (sipas dokumentit në fjalë). Në historikun e Brigadës së 8-të shkruhet:

“Qysh prej datës 15.10.1944 e deri në datën 19.10.1944 u zhvilluan luftime të rrepta në afërsi të qytetit prej forcave të Batalionit të 4 të, kurse në orën 18.35 po të datës 19 (tetor) forcat e batalionit hynë në Lushnjë, duke mos i lënë rast armikut të plaçkisë dyqanet e popullit ose t’i djegi”.

Pra fjala është për “në afërsi të qytetit” dhe nuk bëhet fjalë për “çlirim”, por goditje të bishtit të autokolonës armike.