Nga Kastriot Dervishi

Vetëm pak ditë më parë u përkujtua revolta e Spaçit. Për herë të parë, organizatorët kishin vendosur një flamur kombëtar në të cilin kishin grisur vendin ku qëndronte ylli i kuq komunist. kjo simbolikë ishte paraqitur për të treguar se në këtë formë ishte ngritur edhe flamuri shqiptar në revoltën e Spaçit të vitit 1973. Rasti në fjalë si metodologji ishte kopjuar nga ngjarjet antikomuniste në Rumani dhe Republikën Demokratike Gjermane. Në revoltat e nëntor-dhjetorit 1989 në Berlin e më pas në Rumani, qytetarët kishin si simbol të veprimeve të tyre grisjen e pjesës komuniste të flamujve përkatës. Në rastin e Shqipërisë, në vitin 1973 nuk kemi pasur ndonjë flamur të grisur pasi flamuri u përgatit nga e para brenda disa orëve dhe u vendos atje. Simbolikisht, kopjimet e këtij lloji, sipas modeleve të vendeve të tjera, nuk janë gjë tjetër veçse kopjime të trasha që nuk shkojnë me asnjë realitet shqiptar. Komunizmi i Shqipërisë as ka të krahasuar me komunizmin e Republikës Demokratike Gjermane si në formë e ashtu në përmbajtje. Referime apo kopjime të këtij lloji, që shihen edhe në raste të tjera, veçse largojnë të vërtetën dhe e bëjnë atë edhe më të pabesueshme.