Së paku 24 persona kanë vdekur në Iran në disa incidente të ndara, pas konsumimit të alkoolit, raportojnë mediat iraniane.

Numri më i madh i vdekjeve u shënua në Bandar Abas, ku u shënuan 16 viktima.

"Numri i personave të hospitalizuar nga helmimi me alkool ka arritur në 168, ndërsa 16 nga ta ndërruan jetë dhe 8 prej tyre janë në gjendje kritike”, deklaroi zëdhënësja, Fatemeh Norouzian.

Shefi i Policisë së rajonit Bandar Abas, tha se një cift është arrestuar mbi dyshimet për prodhimin e këtij lloj alkooli.

Që nga revolucioni i vitit 1979, alkooli ka qenë i ndaluar në Iran dhe i dënuar me gjobë.

Por, iranianët vazhdojnë të konsumojnë alkool të prodhuar në kushte shtëpie si dhe ato në tregun e zi.

Që nga viti 2014, Irani ka hapur qendrat e rehabilitimit për personat e varur nga alkooli.