Pentagoni ka bërë me dije se urdhri për tërheqjen e trupave amerikane nga Siria është nënshkruar, pas njoftimit të presidentit amerikan, Donald Trump më 19 dhjetor për tërheqje të plotë të trupave amerikane ushtarake. “Urdhri ekzekutiv për Sirinë është nënshkruar”, është cituar të ketë thënë një zëdhënës i ushtrisë amerikane më 23 dhjetor, ka raportuar agjencia e lajmeve, AP.

CNN ndërkohë ka thënë se një zyrtar i Mbrojtjes ka konfirmuar se urdhri është nënshkruar dhe është cituar të ketë thënë se Sekretari amerikan i Mbrojtjes në ikje, James Mattis, gjithashtu e ka firmosur këtë urdhër.

Presidenti Trump ka deklaruar më 19 dhjetor fitore kundër grupit militant, Shteti Islamik (IS) në Siri dhe ka bërë njoftimin e papritur për tërheqje të plotë të trupave prej vendit të shkatërruar nga lufta. Trump ka pranuar kritika nga ligjëvënësit demokratë si dhe ata republikanë, duke përfshirë edhe ish-liderë qeveritarë dhe aleatë ndërkombëtarë, për atë që është cilësuar si tërheqje e parakohshme e forcave amerikane nga Siria.

Në këtë vend forcat amerikane kanë mbështetur sirianët arabë dhe ata kurdë në luftën kundër IS-it nga viti 2015. Shumë kundërshtarë kanë thënë se tërheqja e shpejtë e trupave të SHBA-së, do të përbënte tradhti për aleatët kurdë, të cilët mund të rrezikohen nga forcat turke.

Kjo pasi Ankaraja akuzon kurdët në Siri se kanë lidhje me Lëvizjen kurde që realizon kryengritje në Turqi. Madje për disa kritikë, tërheqja amerikane mund të konsiderohet edhe fitore për Iranin dhe Rusinë që janë aktive në këtë shtet.