BERLIN - Kreu i entit rregullator të vaksinave në Gjermani tha se disa grupe njerëzish që jetojnë në Gjermani mund të vaksinohen në fillim të vitit të ardhshëm kundër koronavirusit që ka vrarë qindra mijëra dhe shkatërroi ekonominë globale.

Më shumë se gjysmë duzine prodhuesish të barnave në të gjithë botën po kryejnë studime të avancuara klinike, secili me dhjetëra mijëra pjesëmarrës dhe disa presin të dinë nëse vaksinat e tyre COVID-19 funksionojnë dhe janë të sigurta deri në fund të këtij viti, njofton Reuters.

Klaus Cichutek, kreu i Institutit “Paul Ehrlich” tha për grupin mediatik “Funke” se të dhënat nga eksperimetet e Fazës I dhe Faza II treguan se disa vaksina dhanë një përgjigje imune kundër koronavirusit.
"Nëse të dhënat nga provat e fazës III tregojnë se vaksinat janë efektive dhe të sigurta, vaksinat e para mund të aprovohen në fillim të vitit, ndoshta me kushte të bashkangjitura," tha ai.

"Bazuar në sigurinë nga prodhuesit, dozat e para për njerëzit në Gjermani do të jenë në dispozicion në atë kohë, në përputhje me përparësitë e përcaktuara nga Komiteti i Përhershëm i Vaksinimit," tha Cichutek, duke iu referuar grupit që bën rekomandime për përdorimin e vaksinave të licencuara në Gjermani.

Koronavirusi ka infektuar më shumë se 22 milion njerëz në mbarë botën që nga zbulimi i parë në Kinë në fund të vitit të kaluar. Pothuajse 800,000 kanë vdekur.