Kancelarja e Gjermanisë, Angela Merkel tha këtë të hënë se i sheh gjashtë shtetet e Ballkanit Perëndimor si anëtare të ardhshme të Bashkimit Evropian për arsye strategjike.

"Është në interesin e vetë Bashkimit Evropian të çojë procesin përpara këtu," u tha Merkel gazetarëve pas një konference virtuale me kryeministrat e Ballkanit Perëndimor në kuadë të Procesit të Berlinit, duke lënë të kuptohet për ndikimin e Rusisë dhe Kinës në rajon, por pa i përmendur ata.

Ajo tha se bashkëpunimi më i fortë rajonal i promovuar që nga viti 2014 tashmë kishte arritur suksese fillestare, të tilla si një marrëveshje roaming që sapo kishte hyrë në fuqi.

Në konferencë morën pjesë krerët e qeverive të Serbisë, Shqipërisë, Maqedonisë Veriore, Bosnjë-Hercegovinës, Malit të Zi dhe Kosovës, si dhe Presidentja e Komisionit Evropian Ursula von der Leyen.

Von der Leyen tha: "Prioriteti ynë i parë është përshpejtimi i agjendës së zgjerimit në të gjithë rajonin dhe mbështetja e partnerëve tanë të Ballkanit Perëndimor në punën e tyre për të kryer reformat e nevojshme për të përparuar në rrugën e tyre evropiane."

Në konferencën me video, Presidenti i Francës Emmanuel Macron kishte "deklaruar shumë qartë" mbështetjen e tij për perspektivën e gjashtë shteteve të bashkuar me BE, theksoi Merkel.

Më vete, Merkel tha se Gjermania do të jepte 3 milion doza vaksinimi COVID-19 për vendet e Ballkanit Perëndimor "sa më shpejt të jetë e mundur".

Burimi: Reuters