Nga Rene Garzke, BILD

Shefi i Tesla-s, Elon Musk e ka trazuar edhe njëherë internetin- duke sjellë edhe ngacmime nga diktatori çeçen, Ramzan Kadyrov, njeriu besnik i Putinit.

‘Qeni i gjakut’ i Kremlinit ka publikuar në kanalin e tij në Telegram një tiradë zemërimi kundër Musk. Shkaku: Bosi i Tesla-s e kishte sfiduar despotin rus, Vladimir Putin në një dyluftim për Ukrainën. Ai shkruante: “Unë jam absolutisht serioz”.

Islamiku Kadyrov u tall në Telegram: “Elon Musk, një këshillë: mos e mat forcën tënde me atë të Putinit. Jeni në liga krejtësisht të ndryshme”.

Putini do të duket shumë josportiv nëse ‘do mundet nga ju, një kundërshtar shumë më i dobët’, vazhdoi tiradën shefi i çeçenëve. “Prandaj duhet të fryni muskujt për t’u shndërruar nga Elona në një Elon brutal”.

Për këtë arsye, Kadyrov i rekomandon miliarderit një shumëllojshmëri kursesh stërvitore, për shembull me ushtrinë çeçene.

Si zakonisht, Musk reagoi thatë ndaj zemërimit të çeçenit, duke shkruar në Tëitter: “Faleminderit për ofertën, por një edukim kaq i shkëlqyer do të më jepte një avantazh shumë të madh”.

Shefi i Tesla-s vazhdoi: “Nëse Putini ka frikë nga beteja, unë do të përdor vetëm dorën time të majtë edhe pse nuk jam mëngjarash”.

Pas kësaj, ai e ndryshoi për pak emrin e tij në Tëitter në Elona Musk.

Sipërmarrësi është përfshirë në luftë menjëherë pas fillimit të pushtimit rus të Ukrainës.

Në përgjigje të një kërkese nga ministri dixhital i Ukrainës për t’i siguruar vendit një lidhje të qëndrueshme interneti, Musk vendosi lidhjen e dëshiruar brenda pak orësh duke përdorur satelitët e tij Starlink