Avokatët e Trump thanë se do e apelojnë këtë vendim, kurse vetë ish-presidenti tha se kjo është një vepër e miliarderit majtist, George Soros. 

“Nuk është çudi që Gjykata e Lartë e Kolorados me të gjithë anëtarët e saj të caktuar nga demokratët, ka vendosur kundër presidentit Trump, sipas një skeme të financuar nga Soros për të ndërhyrë në zgjedhje për llogari të të pandershmit Joe Biden,, duke hequr emrin e Trump nga fleta e votimit dhe duke eliminuar të drejtën e votuesve të Kolorados për të zgjedhur kandidatin ëq duan”, thuhet në deklaratë.

Trump thekson se demokratët janë në gjendje paranoje për shkak se ai është shumë përpara në sondazhe. 

“Ata kanë humbur besimin te presidenca e dështuar e Biden dhe tani po bëjnë gjithçka për të ndaluar votuesit amerikanë që ta flakin atë nga zyra nëntorin që vjen”.

Një zëdhënës i Trump tha se pritet të apelohet ky vendim, që me shumë gjasa do të shqyrtohet nga Gjykata e Lartë e SHBA.

Vendimi i Gjykatës së Lartë të Kolorados, 4 me 3, e cilëson zotin Trump si kandidatin e parë presidencial në historinë e Shteteve të Bashkuara që të konsiderohet i papërshtatshëm për Shtëpinë e Bardhë, sipas një dispozite të Kushtetutës amerikane të përdorur rrallë herë që i ndalon zyrtarët e përfshirë në “trazira ose rebelim” që të mbajnë poste publike.

Gjykata arriti në përfundimin se Kushtetuta amerikane e ndalon përfshirjen e emrit të kandidatit kryesor republikan në fletën e votimit në Kolorado për shkak të rolit të tij në nxitjen e dhunës kundër qeverisë amerikane.