Për të tretën javë radhazi, gazetarët e transmetuesit publik spanjoll RTVE, kanë mbajtur zi në shenjë protestë për t’u revoltuar ndaj partisë së kryeministrit Mariano Rajoy që ndërhyn në lajmet e tyre.

Sipas mediave spanjolle, gazetarët e televizionit publik i frikësohen dëmtimit të besueshmërisë së kanalit televiziv.

Revolta e gazetarëve të transmetuesit publik nisi, pasi Partia Popullore Konservatore e cila është në pushtet, hodhi poshtë propozimin e opozitës që zgjedhja e kryetarit të ri të pavarur për kanalin të bëhej përmes një konkursi publik.

Sipas stafit të “RTVE”, ky lloj menaxhimi hedh dyshime mbi kredibilitetin e kanalit dhe i hap rrugë manipulimit të qëllimshëm të lajmeve në favor të partisë në pushtet, qoftë duke mbajtur informacionin të fshehtë apo mbulimin e pasaktë.

Veshja me të zeza u përdor si një simbolikë, për të treguar se ata donin një transmetues publik shumëngjyrësh, pra të larmishëm, të pavarur dhe profesional.

Një nga pikat kyçe, është rasti i Katalonjës e cila kërkon shkëputjen nga Spanja, çështja më problematike në vend por që nga televizioni publik u minimizua dhe nuk iu kushtua rëndësi.