Dimensionet shkatërruese që i janë dhënë institucionit të rëndësishme Kushtetues si Prokuroria e Përgjithshme nga Arta Marku janë të pafundme.

Përveçse e shndërroi institucionin në të cilin u zgjodh në mënyrë antikushtetuese në simbolin e ndërhyrjes politike dhe të vënies në dispozicion të një bande kriminale me çfarëdolloj kostoje, kjo zonjë e bëri gjithnjë e më shumë qesharake Prokurorinë.

E tillë ishte edhe ajo marrëveshja e firmosur nga Arta Marku me Komisionin Qendror të Zgjedhjeve për gjoja bashkëpunimin për mbarëvajtjen dhe garantimin e një procesi zgjedhor të ndershëm e demokratik.

Si mundet të tregohen kaq të pafytyrë? Znj. Marku para se të firmosë atë marrëveshje duhet të na tregojë se çfarë ka bërë me dosjen “339” ku për turp të shtetit shqiptar edhe pse është denoncuar nga media të rëndësishme ndërkombëtare, ende nuk është marrë në konsideratë hetimi nga ana e Markut.

Po me dosjen e Lezhës, dosjen e Elbasanit, atë të Dibrës çfarë do të bëhet znj. Marku? Pse nuk është hetuar deri tani krimi në procesin zgjedhor? Pse do të fillojë pikërisht tani? Këto janë pyetje që duan përgjigje.

Ajo që e bën edhe më të pabesueshme dhe qesharake marrëveshjen e firmosur është se ajo na qenka firmosur nën kujdestarin e vetë drejtuesve të OSBE-së në vendin tonë.

Këtyre drejtuesve që punën më të rëndësishme kanë të plotësojnë fjalëkryqe edhe pse vendi ndodhet në një udhëkryq të rrezikshëm.

Si mund ta kemi harruar kreun e OSBE, Bernd Borchardt, i cili bëri një koment përpara zgjedhjeve të vitit 2017, që bëri shumë bujë. Duke folur për mediat ai tha se “qarkullojnë më shumë se 2 miliardë euro para të pista. Pra ekziston risku se këto para mund të përdoren për të blerë deputetë”. Vetëm pak ditë më vonë doli dhe e përgënjeshtroi veten, pas presioneve.

Ndaj ajo marrëveshje e firmosur nga Arta Marku, me bekimin e OSBE-së, është një letër e pavlerë, një marrëveshje e cila të bën të neveritësh nga arroganca dhe papërgjegjshmëria e drejtuesve të institucioneve këtu por edhe të ca ndërkombëtarëve. 55news.al